Шесто порибување на Осломејското Езеро беше извршено вчера, во доцните вечерни часови. Спортското риболовното друштво „Хантер Фиш“ од Кичево за најновото порибување обезбеди 520 килограми крупни примероци на крап со тежина од 10 до 20 килограми, обезбедени од рибникот „Акватик“ кај Неготино.
-Пред првиот годинешен крапски риболовен натпревар „Боила куп“, што ќе се одржи следниот викенд на Осломејско Езеро, извршивме порибување на езерото со 520 килограми крупни примероци на крап со тежина од 10 до 20 килограми на примерок. Овие количества на крап ги обезбедивме од рибникот „Акватик“ кај Неготино, истакна претседателот на клубот Бесмир Елези.
Тој информираше од кои извори се обезбедени средства за најновото порибување на езерото.
-Средствата за ова порибување ги обезбедивме од повеќе извори и тоа доброволни прилози од членовите на спортско риболовното друштво „Хантер Фиш“ од Кичево, од членарини и дел од котизацијата што ја уплатија клубовите кои ќе земат учество на првиот„ Боила куп“ за годинава и каде досега се пријавени 20 екипи од кои четири од странство, рече Елези, пренесува МИА.
Тој потсети дека во изминативе две недели е извршено порамнување и посипување со ризла на пристапниот пат до езерото, а обезбедени се уште 9 нови позиции за риболовни екипи за претстојниот натпревар.
-Нашата желба езерото да го порибиме пред првиот „Боила куп“ за годинава успеавме да ја реализираме. Со оваа количина ќе придонесеме натпреварот да биде крајно неизвесен и без да има фаворити околу идниот победник. Може да се случи некоја екипа да улови помал број примероци крап, но со поголема тежина и да се пласира високо на натпреварот. Токму од тие причини бевме заинтересирани час поскоро да го порибиме езерото и да внесеме целосна неизвесност околу идниот победник на натпреварот, додаде претседателот Елези.
