Претставници на националното здружение на земјоделци Агроунија, како и самите овоштари, во вторникот донеле повеќе од еден тон јаболка пред зградата на полското министерство. Револтираните производители ги прашале политичарите што да направат за да се подобри состојбата на пазарот за откуп на јаболка, пишува Фармер.
Ситуацијата на овој пазар е трагична, опишаа Михал Колоџијчак, овоштарот Себастијан Анишкевич од Агроунија и претставници на овоштарската индустрија.
„Зад нас е еден тон јаболка, кој чини околу 118,43 евра, што е околу 0,02 евра за килограм. Во продавницата овие јаболка чинат 0,75 евра за килограм“, предупреди Колоџијчак, пренесе Agroklub.
Овоштарот Анишкевич објаснил дека производителите не можат да го продадат родот поради ембаргото за извоз на јаболка во Белорусија.
Додал дека овошјето може да се продава на собирен пункт или директно во продавница, но цените се околу 0,13 евра, што со производствен трошок од 0,32 евра значи дека многу производители се на работ на банкрот и напуштање на фармите.
Ново намалување на цените предизвикаа најавите на Министерството за земјоделство и рурален развој на Полска. Најавија дека ќе го кофинансираат откупот на јаболката, но никој не кажал кога и колку ќе бидат овие субвенции. Во исто време сите компании најавија дека ги намалуваат цените за 0,02 евра.
Полските овоштари се прашуваат каде е надлежниот министер, каде се субвенциите. „Овоштарниците се распаѓаат, а политичарите не прават ништо за тоа“, додаде Колоџијчак.
Јаболката кои биле изложени биле донирани во народната кујна за бездомници во Варшава, а една гајба била подарена на секретаријатот на Министерството за земјоделство и рурален развој на Полска.
