Земјоделците почнаа со пролетната сеидба во речиси сите делови на Украина, независно од тоа што продолжуваат нападите на руските сили, соопштија властите во Киев.
-Сеидбата не почнала само во Луганск, изјави синоќа премиерот Денис Шмихал. Луганск инаку е под целосна контрола на руските сили.
Министерството за аграрна политика и храна на Украина предвидува дека оваа година во таа земја ќе може да се посее 70 отсто од земјоделското земјиште.
Владата во Киев за земјоделскиот сектор обезбедила поволни заеми во вредност од 3,5 милијарди гривни или 116 милиони долари.
-Истовремено настојуваме да ги поедноставиме постапките за регистрација на земјоделска технологија, со цел да нема застои во земјоделските работи, истакна Шмихал.
Украина спаѓа меѓу водечките производители на жито во светот, така што слаб принос би можел да предизвика недостиг и скок на цената на житото на меѓународните пазари на земјоделски сировини.
„Од планираните 70, околу 30 до 40 проценти ќе бидат за домашна потрошувачка. А ќе остане и за извоз“, изјави заменик министерот Тарас Висотски, нагласувајќи дека најважни се безбедноста на земјоделците и ресурсите за работа. Тој во изјава за медиумите ги повика и сите земјоделци доколку на терен наидат на сомнителен предмет да ги повикаат надлежните служби, додавајќи дека и покрај намалувањето, Украина ќе има доволно храна.
