Пролетва во Србија ќе бидат засеани околу два милиони хектари, при што најголема површина традиционално зазема пченката – околу 950.000 хектари, што е за околу 70.000 хектари помалку од лани. Поради добрата цена, но и проблемите во Русија и Украина, српските земјоделци ќе сеат повеќе маслодајни семиња – соја и сончоглед, пренесува РТС.
Според најавите на домашните земјоделци, сончогледот би можел да заземе околу 250.000 хектари, околу 30.000 хектари повеќе од лани. Се проценува дека поради воените конфликти во Украина, производството на сончоглед во таа земја би можело да падне на најниско ниво во последните 13 години – на околу 4,3 милиони хектари, една третина помалку од минатата година.
„Оваа година маслодајните семиња ќе бидат поинтересни од пченката, пред се поради недостигот од споменатите земји, бидејќи тие се одговорни за 80 отсто од светското производство на сончоглед, но и поради помалите инвестиции кои се неопходни кога се работи за сеидба на сончоглед и соја во однос на пченка“, рече Сунчица Савовиќ, директорка на здружението „Жита Србије“ за РТС.
Како што пишува Агроклуб.рс, пресметките покажале дека инвестициите во хектар пченка се околу 1.000 евра, додека на истата површина се сее сончоглед за 600 до 700 евра.
Потенцијал за маслодајна репка
Освен за сончогледот, голем интерес има и за маслодајната репка која лани била засеана за речиси 30 отсто повеќе површини од претходната година. Тоа маслодајно растение го произведуваат добро организирани земјоделци со прецизна механизација, пренесува РТВ.
„Предвидувам дека приносите ќе бидат добри без оглед на потенцијално критичниот период што претстои, а тоа е растот на културите, цветањето и формирањето на семето. Доколку се одржи пролетната влага и нема временски непогоди, ќе имаме добри приноси“, изјавила за овој медиум Ана Марјановиќ Јеромела, експерт на Новосадскиот институт за полски и градинарски култури .
