Владата на Украина ги отстрани пченката и сончогледовото масло од списокот на стоки кои подлежат на извозни дозволи, објави Аpk-inform.
Имено, тие на 5 март одредија дека покрај забраните за извоз на ‘рж, овес, просо, хељда, сол, шеќер, месо и добиток, ќе воведат и забрани за своите клучни производи, пченица, пченка и сончогледово масло, како и пилешко месо и јајца.
Но, минатата недела, Микола Горбачов, во име на Украинската асоцијација за житарки (UGA), испрати писмо до премиерот Денис Шмихал, барајќи укинување на дозволите за пченка и сончогледово масло, како и за пченица.
Во тоа писмо, тој понудил и низа предлози со кои извозните текови од пристаништата на Црното Море би се префрлиле на копнени патишта. Потсетил и дека земјата дневно извезувала околу 200 илјади тони жито преку пристаништата, а сега копнените патишта дозволуваат само околу 20 илјади тони дневно, што е десет пати помалку. Тој нагласил дека послабиот извоз ја загрозува кампањата за пролетна сеидба бидејќи земјоделците ги користат парите за покривање на трошоците.
„Ја анализиравме ситуацијата и заклучивме дека укинувањето на лиценците ќе ни овозможи да го забрзаме извозот. UGA веќе им се обрати на нашите европски колеги и сега бараме од владата да ја поддржи оваа иницијатива за поедноставување на трговијата меѓу Украина и ЕУ“, рекол тој.
Кога станува збор за сеидбата, Министерството објави прогнози дека под главни пролетни култури на територијата што ја контролира Украина ќе бидат 5,99 милиони хектари, што е за 1,689 милиони хектари помалку од лани. Сеидбата започнала во 11 области, а во огласот се нагласува дека лани во ова време работите се уште не биле започнати.
Земјоделците посеале 22,5 илјади хектари со пролетна пченица, 74,8 илјади хектари со пролетен јачмен, со маслодајна репка 1,6 илјади хектари, овес 15,2 илјади хектари, грашок 21,1 илјади хектари, шеќерна репка 3,3 илјади хектари, сончоглед 2,2 илјади хектара, соја 2 илјади хектари.
Заменик-министерот за земјоделска политика и храна на Украина Тарас Висоцки изјави дека ќе се посеат помалку сончоглед и пченка од вообичаено, а акцент ќе биде ставен на оние кои полесно се одгледуваат и се важни за безбедноста на храната, пренесува Аpk-inform.
Земјоделците ќе сеат повеќе грашок, јачмен и овес кои се полесни за одгледување и се важни за исхраната. „Значи, преминуваме од извозни на прехранбени култури за домашна потрошувачка“, рече Висоцки, нагласувајќи дека засеаните површини ќе се намалат за 30 проценти.
