Со своите 41,5 милиони хектари обработливо земјиште, Украина е клучна за глобалното земјоделство.
„Сеењето пченка во Украина би можело да биде неизвесно“, изјавил новинарот од Киев, Јуриј Михаилов за Successful Farming, коментирајќи ги актуелните случувања во оваа европска земја.
Михајлов верува дека пролетната сезона нормално ќе се одвива на западот од земјата, каде што најмногу овошје и зеленчук се одгледува во оранжерии.
Доминантно земјоделство
Украина ја нарекуваат житница на Европа, а покрај тоа, таа е клучна за глобалното земјоделство. Имено, располага со повеќе од 41,5 милиони хектари обработливо земјиште кое зафаќа дури 70 отсто од целата земја. Најквалитетната црна земја, позната како чернозем, учествува со дури 25 проценти. Според Аgweb, во 2020 година, украинскиот земјоделски сектор генерирал околу 9,3 отсто од бруто домашниот производ. Поледелството доминира и сочинува 73 отсто од земјоделското производство.
Главни посеви во земјата се сончогледот, пченката, сојата, пченицата и јачменот. На глобално ниво оваа земја е прва по одгледувањето сончоглед. Пред оваа вонредна состојба, а според проценките на Министерството за земјоделство на САД, во сезоната 2021/22 се очекуваа рекордни 17,5 милиони тони сончоглед.
Шести е по производство на пченка, на шесто место во светот во производството на јачмен, на седмо во производство на маслодајната репка и деветто во производство на соја и пченица.
Производството е првенствено поделено во две групи – земјоделски претпријатија и домаќинства. Првата група сочинува 55 отсто од БДП и се состои од 45.000 бизниси. Втората група се состои од повеќе од 4 милиони домаќинства кои обработуваат во просек 1,23 хектари земја, што претставува речиси 45 отсто од БДП, според Државната служба за статистика на Украина.
Треба да се напомене дека до минатата година имаше мораториум за откуп на земјоделско земјиште. Во јули тој беше укинат и земјиштето е достапно за продажба на граѓаните, до 247 хектари по поединец. Според сегашниот план, од 2024 година тоа ќе им биде дозволено и на правни лица кои ќе можат да откупат до 24.710 хектари.
Најмногу се извезува пченка и сончоглед
Уделот на земјоделството во извозните приходи се зголеми од 26 отсто во 2012 година на 45 отсто во 2020 година кога достигна вредност од 22,2 милијарди долари. Основа и натаму е извозот на суровини, главно жита и маслодајни семиња. Сончогледовото масло е втор најголем извозен производ по пченката, со вредност од 5,8 милијарди долари или 7,6 отсто од вкупниот извоз. Исто така, произведува значителни количини живина, фуражни и сточарски култури, компири, шеќерна репка и разновидно овошје и зеленчук.
Оваа година Украина беше предвидено да учествува со 12 отсто од светскиот извоз на пченица, 16 отсто пченка, 18 отсто јачмен и 19 отсто маслодајната репка.
Кога станува збор за извозот на пченица, најголем дел од ова жито се испорачува наесен, а дел и на почетокот на зимата. Извозот на пченка започнува кон крајот на есента и продолжува во првата половина од годината, додека сончогледовото масло се испорачува во текот на целата година со пократок сезонски пад кон крајот на летото.
„Значи, секое нарушување на трговијата веројатно повеќе ќе се почувствува за пченката и сончогледовото масло отколку за пченицата“, коментира Џозеф В. Глаубер од Меѓународниот институт за истражување на политиката за храна, заклучувајќи дека постои голема загриженост доколку ситуацијата ја наруши пролетната сеидба.
