Со благослов од свештенството при црквата „Успение на Пресвета Богородица“, пчеларите од Македонска Каменица и околните градови, денеска го прославија својот заштитник „Св.Харалампиј“. Настанот, кој прераснува во традиција, го организираше каменичкото здружение „Еко Кам Мед“.
Претседателот на здружението Боге Јанковски ја оцени како успешна изминатата година и најави дека дека здружението ќе продолжи да ги снабдува пчеларите со стручна литература и медоносни садници.
– Оваа година, благодарение на Општината и Советот ќе биде поделена литература за зголемување на знаењето на пчеларите. Благодарение на општината, како и на рудникот „Саса“ со 2000 садници ќе бидат збогатени корените со бадем и питом костен. Денес, секој ќе добие корени од овие медоносни дрвја, а останатите ќе ги посадиме во текот на неделава околу речното корито на Каменичка река, рече Јанковски.
Пчеларот Миле Малчовски од Македонска Каменица е задоволен од годината што измина. Тој одгледува 50 пчелни семејства на местото викано Рашките кај село Луковица, со вкупен годишен приход од 7 до 10 килограми произведен мед од едно пчелно семејство. Како најголем проблем изминатата година Малчовски ја посочува појавата на „црн“ мед кој правел штета бидејќи пчелите не се развивале правилно.
Пчеларот Славе Митевски, кој на неодамнешниот натпревар во Тетово за својот мед и пчелни производи ја освоил првата награда во конкуренција на пчелари од 21 држава, вели дека годината на почетокот била слаба, а потоа задоволителна.
-Од пред неколку години сум пчелар, произведувам за себе и за другите, а освен мед произведувам и други пчелни производи како прополис и сл. Пчелите ми се стационирани во село Дулица на свое земјиште, имам 30-тина пчелни семејства. Изминатата година беше „и вака и така“, почетокот беше многу слаб, а потоа годината беше задоволителна, изјави Митевски.
Младен Николовски, кој е еден од поискусните пчелари во регионот, вели дека каменичкото здружение е едно од ретките што се организираат на ваков начин. Според него, во Македонска Каменица со пчеларство се занимаваат над 100 пчелари кои, како што вели, во последно време го користат интернетот за подобра промоција на медот.
– Нашиот мед доста е баран, бидејќи самата околина го нуди тоа и штета е да не го искористиме. Во однос на најзастапеното прашање дали може да се живее од пчеларство, моја препорака е да се почне со три до пет сандаци и да се види дали може да се работи со пчели. Тоа е работа која бара доста наука и поддршка од семејството, изјави Николовски, кој годинава најмногу стравува од зазимената храна за пчелите која според него не е квалитетна и може да создаде проблеми по пчелните семејства.
Во однос на информираноста на пчеларите за користење на ИПАРД мерките, претседателот на здружението Јанковски вели дека пчеларите генерално ги знаат информациите, но според него потребна е поголема подготовка за навремено аплицирање.
– Во последно време, Министерството ги информира пчеларите за промените околу нивните права како субвенции, апликации за ИПАРД и друга поддршка и повици кои ги има АФПЗРР, иако мислам дека може да се зголеми информирањето, во смисла на тоа да се направи тим кој ќе ги информира пчеларите за критериумите многу порано пред да се објават повиците со цел да бидат подготвени, истакна Јанковски.
