Цените на вештачките ѓубрива растат секој ден, а Европската Унија има за цел да ја намали нивната употреба. Во исто време, големите хемиски компании инвестираат стотици милиони долари во развојот на земјоделски производи за прихрана на посевите на база на микроби и алги.
Во време кога емисиите од фармите се повеќе се контролираат, ваквите производи би можеле да им помогнат на земјоделците да ја намалат употребата на азот, кој може да ги загади водотеците и да создаде азотен оксид. Затоа, инвестициската банка Рабобанк предвидува дека индустријата за биостимуланти од 3 милијарди долари ќе расте за 12-15 проценти годишно во следните пет години, пишува Ројтерс.
Но, пазарите на микробни ѓубрива во голема мера се нерегулирани, а има само неколку студии за тоа колку се ефективни во зголемувањето на приносот. Европската Унија ќе го објави првото барање за ефикасноста на биостимулантите во јули 2022 година, а Агенцијата за заштита на животната средина на САД издаде нацрт-упатства за јавна ревизија.
Џон Трелоар, агроном во „Novozymes“ во Данска, чии производи содржат габа која расте покрај корените на растенијата и ослободува фосфат, изјавил дека клиентите сѐ уште се претпазливи. Во оваа компанија ги собираат резултатите од теренските тестирања што ги прават кај земјоделците.
„Ако имаат лошо искуство, тоа може да ја оштети целата индустрија“, посочи тој.
До каде оди развојот на ваквите производи сведочи изјавата на Карстен Теме, извршниот директор на компанијата „Pivot“, кој можноста микробите да го фиксираат азотот од воздухот во амонијак ја нарекува свет грал на земјоделството.
„Нашите производи не генерираат високи емисии од производството на азотни ѓубрива, ниту пак произведуваат емисии на азотни оксиди од распаѓањето на ѓубривата со текот на времето“, рече тој.
На вакви активности работат и во „Bayer“, каде заедно со биотехнолошката компанија Ginko Bioworks инвестираат во производот Joyn Bio.
„Очекуваме комерцијална продажба на нашиот третман на микробиолошки семиња за три до четири години“, рече извршниот директор Мајк Миј.
Критика на биостимуланти?
Yara International, исто така, произведува биостимуланти врз основа на алги и хумусни супстанции. Компанијата за семиња „Corteva“ оваа пролет лансира биолошки производ за кој вели дека апсорбира азот од атмосферата и го претвора во амонијак.
Сепак, не треба да се изостави дека на сметка на биостимулантите доаѓаат и критики. Во изминатите две сезони, Даниел Кајзер, научник од Универзитетот во Минесота, го тестирал докажаниот производ на „Pivot“ на шест локации каде што се применувало азотно ѓубриво помалку од оптималното. Само на еден од нив е забележан подобрен принос.
Треба да се напомене дека Европа сочинува половина од глобалниот пазар за овие средства, според податоците на Европскиот совет на индустријата за биостимуланти. Земјоделците првично ги користеа главно за органско производство и за овошни и зеленчукови култури со висока вредност, но сега тие се сè поприсутни во конвенционалните култури како одговор на намерата на ЕУ да го направи земјоделското производство поодржливо, пренесува Agroklub.
