Никола Муловски од Слепче, Демир Хисар, сопруг и татко на 3 деца, на својата фарма во селото Слепче, оддалечено два километри од Демир Хисар, одгледува кози од 2015 година. На тоа во најголема мера го поттикнала љубовта кон овие благородни животни.
-Уште мојот дедо чувал десетина кози и љубовта кон нив продолжува да се одржува во нашето семејство. Моментално имаме околу 50 грла, 30 големи и дваесетина женски јариња оставени за приплод. Козјото млеко е далеку поздраво од кравјото и има околу 80% сличности со мајчиното што е и препорачливо од педијатрите за малите деца – вели Никола.
Козарството им е семеен бизнис, а околу работата на фармата помагаат сите членови од семејството на Никола.
-Козите ги чуваме во монтажни објекти од дабово дрво (штици), а објектите се правени со сопствени средства. Ги храниме со сено, детелина, јачмен, пченка, резанец кои во најголема мера сами ги произведуваме. Обработуваме околу 50-тина декари земја од кои 20 се за пченка, 20 за жито и 10 за детелина.
Никола во својот асортиман покрај козјо месо има и други различни производи направени од козјото млеко.
-Од козји производи имаме традиционално бело сирење, жолто сирење, сирење со секаков вид зачини по желба на купувачот, кисело млеко, павлака, урда, сурутка и многу други производи. Кај нас љубителите на јарешко месо имаат можност да порачаат и јаре печено во фурна на стар традиционален начин.
Никола вели дека во моментов цената на козјото млеко е ниска со оглед на тоа колку е квалитетно.
-Цената на литар козјо млеко моментално е пониска од цената на литар флаширана вода, некаде околу 19 денари, што е многу мала. Затоа повеќе ни се исплати да произведуваме сирење и други производите од козјо млеко кои се во голем пораст и има голема побарувачка од граѓаните.
Никола смета дека предност за него и неговото семејство е што сами произведуваат храна за козите. Тоа е и основниот услов ако некој сака да се занимава со козарство. Без сопствено производство на добиточна храна овој период не е поволен да се започнува со одгледување кози.
„Ако имаат барем половина од потребната храна за козите нека пробаат, а ако немаат ништо нека не пробуваат воопшто, бидејќи моменталната цена на храната е скокната за повеќе од дупло“ – вели Никола.
За да се поттикне одгледувањето на кози во нашата држава, Никола смета дека најбитно е да има загарантиран откуп и цена на млекото и на јаре.
-Државата малку повеќе да води сметка како за нас сточарите така и за земјоделците. Да има загарантиран откуп и цена на млекото. Исто така да има откуп на јарето.
