За да се укаже на важноста на менталното здравје, на улиците во Лондон деновиве се појавија интересни инсталации од слама во кои минувачите можат да влезат, да се опуштат и да си посветат себеси неколку моменти.
Изгледот на оваа уникатна читална го дизајнирало архитектонското биро „Caukin Studio“, со поддршка и експертиза од локалната терапевтска услуга Self Space.
„Отсекогаш сме биле заинтересирани за тоа како архитектурата и уметноста можат да создадат позитивно општествено влијание. Проектот има за цел да ги тргне посетителите од метежот и вревата во центарот на Лондон во удобен личен простор каде што ќе се чувствуваат удобно да ослободат некои од нивните лични мисли“, изјави коосновачот на студиото Caukin, Харисон Маршал за странските медиуми.
Внатрешноста на оваа „ментална библиотека“ е направена од природни материјали и се обидува да создаде безбедна атмосфера во која луѓето се чувствуваат доволно удобно да разговараат или размислуваат за своето ментално здравје. На влезот се користеле светли бои и светла за да се разбудат различни емоции и спомени. Розовото осветлување има тенденција да ги плени посетителите со топол сјај, додека сината боја го рефлектира светлото небо. Внатре, зелените растенија и книгите за самопомош се наредени на дрвени полици, додека посетителите можат да седат на дрвена клупа и да водат дневник во приватен, мирен амбиент.
„Бевме инспирирани од проектите што ги завршивме во тропските предели во светот и создадовме простор направен од природни материјали; со сламена постава што поверојатно е да ја најдете покрај индонезиските плажи отколку до канцеларискиот блок во Лондон“, рече Маршал.
