Холивудскиот актер Морган Фримен е пофален за чин кој не е поврзан со неговата актерска кариера. Имено, Фримен својот простран ранч во Мисисипи го претворил во прибежиште за пчели. 84-годишниот актер поставил 26 кошници на својот ранч и засадил видови на растенија и дрвја што ги сакаат пчелите, меѓу кои лаванда и магнолија. Вели дека го направил тоа откако дознал за проблемите со пчелите ширум светот.
„Имаше застрашувачки загуби на пчелни заедници, особено во оваа област. Нивната бројка опаѓа до тој степен што научниците сега велат дека ова е крајно опасно. Не разбираме дека пчелите се основата на сè, растот на планетата и вегетацијата“, изјави легендарниот актер во едно интервју.
Фримен е активен и страстен екологист со децении. Климатските промени и помошта при катастрофи остануваат негови приоритети, но пчелите станаа негова страст откако увезе колонии на неговиот простран ранч.
Во раната фаза, тој дознал дека мора да ги нахрани своите нови гости со шеќер и вода откако ќе бидат отстранети од нивната природна средина. Додека пчелите се прилагодувале на нивниот нов дом, Фримен засадил магнолија, детелина, лаванда и овошни дрвја погодни за пчели. Во тоа му помогнал градинар кој и денес се грижи за нивните потреби.
Свесен дека голем дел од глобалното исчезнување на пчелите се должи на зголеменото уништување на нивните природни живеалишта, Фримен работел на тоа да ја направи својата фарма што е можно поодржлива.
Иако заштитните пчеларски костуми се стандардни за оние кои се на терен, Фримен тврди дека не му требаат бидејќи тие „никогаш нема да го боцнат“.
„Сè уште не ме боцнале бидејќи не се обидувам да им земам мед или нешто друго, туку само ги хранам. Мислам дека го разбираат тоа и си велат: „Нема да му пречиме на типов, ни носи шеќерна вода“, вели новопечениот пчелар.
