Граѓаните на истокот и југоистокот, од утре попладне ќе можат да возат по нова, модерна и безбедна обиколница, без притоа да мораат да влегуваат во Штип, рече министерот за транспорт и врски, Благој Бочварски.
„Со ова сообраќајот во Штип се враќа во нормала и затоа посебно сакам да им се заблагодарам на изведувачите за ефикасноста и брзината со која ја завршија оваа активност, но пред сѐ и на граѓаните за трпението што го имаа во овој период.
После 40 години направивме реконструкција на овој патен правец за наредните години и децении, а ќе биде пред сѐ за поголема безбедност и побрз транспорт. Покажавме решителност и волја со цел решавање на долгогодишниот проблем на граѓаните на Штип, Струмица, Радовиш и сите околни општини од источниот и југоисточниот регион.
Обиколница Штип доби нов модерен изглед. Коловозот е проширен на 11,5 метри, со две коловозни ленти од 3,5 метри ширина и две ленти за застанување.
Овој проект е пример како оваа Влада ги реализира капиталните инвестиции во сите општини во државата.
Реализацијата на капиталните инвестиции во нашиот ресор се одвива со засилно темпо и очекуваме до крајот на годината да имаме одлична реализација.
Инвестирајќи во инфраструктурниот развој, инвестираме за просперитетна држава и подобри услови за сите граѓани.“, напиша Бочварски на својот фејсбук-профил.
