Жителите на луксузната населба Норделта во Буенос Аирес ги мачат необични проблеми.
Големи проблеми им задаваат капибарите, глодари кои наликуваат на огромен хрчак, пренесува The Wall Street Journal. Лутаат во рекорден број, ги уништуваат негуваните тревници и напаѓаат домашни миленичиња. Во август безбедносна камера снимила како доставувач на храна паѓа од мотор откако се судрил со огромен глодар.
„Не сум против капибарите. Сакам да им ги погалам малите слатки стомачиња како и секој друг“, вели Густаво Иглесијас, 62-годишен агент за недвижности и долгогодишен жител на населбата.
„Проблемот е што нивната популација е надвор од контрола, а луѓето се премногу исплашени за да направат нешто. Никој не сака да изгледа како да се противи на природата“.
Капибарите не изгледаат заканувачки. Нивниот изглед – широката муцка, тркалезното тело и опуштениот темперамент ги прават омилени животни, на пример за посетителите на националните паркови. Овие големи глодари обично живеат во групи од 40 единки.
Се сончаат и пасат, а жителите не гледаат излез
Изгледа дека капибарите уживаат во животот во Норделта. Се сончаат и пасат во вештачките лагуни, каде што се заштитени од природните предатори. Жителите на кои им пречат капибарите не се сигурни што можат да направат бидејќи за лов на глодари потребна е дозвола од еколог.
Но, еколозите блиски до левичарската влада на Аргентина сакаат богатите жители на заедницата да не ги допираат капибарите.
„Бев огорчен што жителите на Норделта се жалеа. Луѓето се тие кои ја нападнаа нивната територија“, рече Адриан Маца, 47-годишен туристички водич во националниот парк.
Други сепак сметаат дека глодарите треба да се преместат, а како причина ги наведуваат сообраќајните несреќи и штетата предизвикана од глодарите кои ги џвакаат тревниците и палмите.
„Па, не можеме да имаме диво животно што трча низ главните улици“, рече 47-годишната учителка Ромина, една од жителите на населбата.
Биологот и конзерватор Талија Замбони рече дека гледа неколку проблеми во пристапот до решение за ситуацијата.
„Овие работи секогаш се поделени помеѓу десните и левите, богатите и сиромашните, а овде меѓу овие поделби се најдоа овие мали животни“.
Жителите предлагаат две решенија
Капибарите претежно живеат околу луксузните имоти долж брегот, кои сочинуваат околу 15% од 3.000 имоти во Норделта. Пензионираниот новинар Марсело Кантон, портпарол на Здружението на локални жители, рече дека неговата група предложила различни решенија до владините регулатори. Едното е да се создаде резерват од 500 хектари за капибарите во Норделта, а другото е да се кастрираат мажјаците.
Но, државните службеници за заштита на дивиоте животни биле недостапни за време на пандемијата, тврди Кантон.
Во меѓувреме, Здружението поставило сообраќајни знаци што ги предупредуваат возачите и велосипедистите да внимаваат на капибарите.
„Беше многу болно да се види како луѓето нè обвинуваат дека ги малтретираме капибарите, бидејќи ние овде исклучително ги почитуваме. Вложуваме многу пари за да ги заштитиме“, рече Кантон.
