Министерот Арјанит Хоџа една година го предводи Министерството за земјоделство, шумарство и водостопанство. По тој повод денеска одржа прес-конференција на која освен за она што Министерството го има сработено во текот на неговиот мандат, одговараше и на новинарски прашања.
На прашањето за Законот за продажба на земјиштето Хоџа рече дека законот, со сите забелешки и коментари од страна на засегнатите страни добиени на јавните дебати, е во финална верзија и е доставен во Владата.
-Сите аргументирани забелешки и предлози се опфатени со можност за измени од страна на пратениците. Врз основа на забелешките направени се промени и прифатено е делот за пренамените, односно продажбата на земјоделското земјиште да не се врши на деловите каде што се граничи урбаниот план на општините со земјоделското земјиште – рече Хоџа
Како што рече министерот, нема да има ограничување во големината на парцелите, земјиштето ќе биде заштитено од пренамена во наредните 10 години, односно нема да може да се пренамени од земјоделско во градежно земјиште, земјоделците ќе можат да го купуваат земјиштето на рати, а почетната и максималмната цена ќе се утврдува врз основа на класите на земјиштето.
Исто така Хоџа нагласи дека целосно е тргнат делот за стратешки инвестиции, односно странски државјани ќе можат да имаат удели во правно лице, но не повеќе од 49% од земјиштето.
– Остануваме отворени во однос на дебатата во Собрание, доколку има и други предлози да ги разгледаме. Законот е пуштен во владина постапка и во текот на септември ќе биде во собраниска процедура – рече Хоџа.
