Во долината на реката Радика, во подножјето на планината Дешат во националниот парк „Маврово“, се наоѓа планинското село Ростуше, во чија непосредна близина се наоѓа водопадот Дуф. Карактеристична за него е блескавата вода што паѓа од недогледните карпи во височините.
Водопадот се наоѓа на лесно достапно место, а до него води обележана пешачка патека во должина од илјада и дваесет метри, така што, доколку се пешачи со просечно темпо, до водопадот се пристигнува за половина час.
Патеката води по кањонот на Ростушка Река, а на крајот од кањонот се наоѓа водопадот, скриен зад карпите, со висина над 25 м.
