Во стратегијата „Од поле до маса“, Европската комисија предложи цели за 2030 година, вклучувајќи и проширување на органското производство на 25 проценти од земјоделското земјиште од сегашните осум проценти и намалување на употребата на пестициди за 50 проценти.
Во европската организација „Cocereal“, која ги обединува трговците со житарки, сметаат дека предложените „зелени цели“ би можеле да го намалат производството на пченица, главната житарка во ЕУ. Во нивната анализа тие најавија дека нејзиното производство може да се намали на околу 109 милиони тони во 2030 година од околу 128 милиони што се очекуваат оваа година.
ЕУ извезува големи количини пченица, но „зелениот план“ може да го смени тоа.
„Значи, ние веќе нема да бидеме еден од големите извозници, туку еден од увозниците“, објасни Оливер Балкхаузен, член на одборот на „Cocereal“ и раководител на истражувањето во „Archer Daniels Midlandu“.
Целите за заштита на животната средина, кои се дел од реформата на Заедничката земјоделска политика, исто така може да доведат до намалување на одгледувањето и на извозот на маслодајна репка. Според овие анализи, ЕУ може да увезува повеќе од 10 милиони тони маслодајна репка годишно, во споредба со сегашните 6 милиони тони.
Кон крајот на минатата година, Министерството за земјоделство на САД предвиде во својата студија дека „зелените цели“ ќе го намалат производството во Унијата. Меѓутоа, во трудот на францускиот агрономски институт INRAE, нивната перспектива беше критикувана како премногу песимистичка. Тие сметаат дека треба да се земат предвид промените во земјоделските практики и потрошувачките трендови.
„Cocereal“ смета дека ризиците од нестабилност на пазарот и преместување на еколошките проблеми во другите делови на светот покажале дека на ЕУ ѝ треба детална проценка на влијанието на нејзините „зелени цели“.
Европската асоцијација на фармери „Copa Cogeca“ предупредува на ова веќе подолго време, реагирајќи на противењето на европратениците за повторно одобрување на употребата на глифосат по 31 декември 2022 година. Тие веруваат дека фаворизирањето на еден столб на одржливост над другите испраќа многу демотивирачка порака до земјоделците ширум ЕУ.
Извор: agroklub.com
