Семејството Богданов во војводинското село Ѓурѓево се занимава со органско производство, а меѓу културите кои ги одгледува тука е и бамјата, зеленчук кој денес наоѓа широка примена во кулинарството и стекна голема популарност.
Александар Богданов зборува за тоа колку бара но и колку е исплатливо одгледувањето на бамја.
Бамјата е особено чувствителна на ниските температури
„Бамјата ја одгледуваме на отприлика 4-5 илјади квадрати. На оваа култура најмногу влијаат температурните услови, односно студеното време“, ја започнува приказната овој органски производител.
Како што вели, минатата година имале голем проблем со производство на бамја бидејќи според временските услови ја засадиле на крајот на јуни (пробале да ја одгледуваат и од расад и од семе, од семе се покажала подобра), па поради доцнењето и плодот бил слаб. Бидејќи и оваа година се неповолни климатските услови, вели дека не е сигурен каков принос ќе може да очекуваат, меѓутоа веќе ја засадиле. Најголема количина која успеале да ја добијат на наведената површина е 2 тони, вели тој.
Покрај бамјата одгледуваат и лешници кои ги имаат под површина од еден хектар, црн грав, мала површина под домат, аспарагус. Истакнува дека пробале и со други култури како што се бела пченка и цвекло, меѓутоа ништо не се покажало како исплатливо, и се задржале само на тоа. Своите производи ги продаваат на пазар и преку социјалните мрежи.
Богданов вели дека производството на бамја не е многу ветувачко.
„Кога е во прашање производството на бамја, доколку заработката се распредели на 12 месеци колку што има годината, се доаѓа до цифра од само 50 до 100 евра месечно, а каде се вложувањата за кои мора да се издвои?“, вели Богданов.
Бамјата се бере по најсилното сонце
Истакнува, дека бамјата бара доста физичка работа. Како што вели, трипати ја окопувале, но тревата и покрај тоа сепак пораснала, а тешко е и берењето. Имено, најдобро е кога таа се бере сува, не наутро кога е роса бидејќи е влажна, така што, тврди тој, најдобро се бере по најсилното сонце.
Кога станува збор за болестите кои ја напаѓаат, се случува некогаш да ја нападне пламеница, а што се однесува до инсектите тоа се смрдливите мартини и растителните вошки. Како што вели, на органските производители им е дозволена употреба на одредена количина син камен по хектар, што ја заштитува од пламеница.
Овој органски производител потенцира дека нивното семејно производство почнало одамна, кога нивниот дедо одбивал употреба на хемиски средства, а дури не сакал да купи ниту трактор, туку долго време обработувал со помош на коњ.
Извор: agromedia.rs
