Заедно со Вицепремиерот задолжен за борба против корупција и криминал, одржлив развој и човечки ресурси, Љупчо Николоски бевме во посета на граничниот премин Ќафасан кој важи за најфреквентен граничен премин од прва категорија кој се наоѓа на пан-Европскиот коридор 8 (исток-запад) кон Република Албанија и е 4-ти најфреквентен граничен премин за стокови пратки во земјата преку кој годишно минуваат стотици илјади превозни средства и патници во и од Република Северна Македонија.
При посетата остваривме работен состанок со управникот Оливер Вучиниќ, помошник управникот Игор Јолески и шефот на царинската испостава Ќафасан, Димитар Којсточинсоки на кој разговаравме за имплементацијата на решението за заедничко управување на граничните и царински контроли со едно застанување „One Stop Shop“ помеѓу нашата држава и Република Албанија на Ќафасан-Ќафтане. Со воведување на ваквиот концепт и на овој ГП се очекува да се намали времето на чекање на превозниците, да се намалат трошоците на економските оператори и најважно, да се намали можноста за царински измами поради непосредниот увид во комерцјалните документи кои ја следат стоката, а со тоа да се намали можноста за корупција и да се зголеми стабилноста и сигурноста во целиот регион.
Во насока на намалување на корупцијата како приоритет на Царинската управа и Владата е модернизацијата и стандардизацијата на граничните премини, а за таа цел во тек е реализација на проект-грант одобрен од USAID – EDGE програмата за грантови, во вредност од 100 илјади американски долари. Оваа заедничка соработка со Царинската управа на Република Албанија опфаќа набавка на опрема за контроли за двете страни на граничниот премин Ќафасан-Кафтане, стручен консултант, обуки и студиски посети за вработени од македонската и албанската царинска управа, во насока на забрзување на времето за контрола и воведување на заеднички контроли на овој граничен премин. Проектот се очекува да заврши до крајот на 2021 година.
Фејсбук статус на Горан Сугарески, директор на Царинска управа.
