Кога Џери Калахан првпат го пробал овошјето сумо портокал пред околу девет години, знаел дека пробал нешто посебно. „Ова ќе се продава како лудо“, помислил тој.
Како потпретседател на синџирот за прехранбени производи „Албертсонс“, работата на Калахан била да најде нешто што ќе се продава добро и затоа пробал најразновидно овошје во својата кариера. Но, сумо портокалот го опишал како единствен: „Искуството на неговото пробување не може да се спореди со ништо друго“.
Овошјето на прв поглед не изгледа примамливо. Изгледа како мал, збрчкан портокал со израсток налик на јазол каков што носат сумо борачите, по што и го добил името. Тоа е всушност хибрид, еден вид мешавина од помелоа и мандарина, а има вкус на исклучително слатка мандарина. Лесно се лупи и не ги прави прстите премногу лепливи.
Во годините откако Калахан го пробал сумо портокалот, популарноста на овошјето во Америка полека растела, за во текот на минатата година, купувачите да потрошат скоро 62 милиони долари на сумо портокали, што е сепак само мал дел од пазарот на мандарина и портокал во вредност од 2,1 милијарди долари.
Што всушност е сумо портокал?
Тоа е заштитен знак на еден вид овошје наречено ширануи, попознато како декопон, кое потекнува од Јапонија. Овошјето е родено во раните седумдесетти години. До 90-тите години на минатиот век, станува популарно и омилено овошје во Јапонија, продавајќи се за само 10 американски долари, напишал самопрогласениот „овошен детектив“ Дејвид Карп во 2011 година во написот за Лос Анџелес Тајмс под наслов „Декопонот доаѓа во Калифорнија“.
Карп го опишал долгогодишниот напор на американските овоштари да дојдат до садници. Некои го шверцувале производот и владата ги принудила да ги исечат садниците, стравувајќи дека ќе прошират штетни растителни вируси. На крајот, Suntreat, кој подоцна станал AC Brands, успеал легално да засади плантажа во Калифорнија, што било направено во тајност. Вклучените одгледувачи потпишале доверливи и ексклузивни договори за маркетинг со Suntreat, напишал Карп.
Тие го измислија името
До 2011 година, компанијата била подготвена да ја открие својата тајна и да им го претстави новото овошје на Американците под друго име. AC Brands сметал дека имињата ширануи или декопон не би биле добро прифатени од американските потрошувачи. И така настанало нешто ново.
– Името сумо портокал е создадено поради тоа како изгледа овошјето. Тоа е џиновско овошје во споредба со традиционалните мандарини, со јазол на врвот што потсетува на оние што ги имаат сумо борачите – изјавила за Си-Ен-Ен, Суниа Гал, директорка на брендовите во „AC Brands“.
Кога се брендира нешто ново, како што е хибридното овошје, препорачливо е да се обидете со име што лесно да се изговара и лесно се наоѓа во продавниците, вели Дејвид Платек, основач и претседател на „Лексикон брендинг“, кој им помага на компаниите да изберат имиња на производите.
Секоја овошка се бере рачно и се пакува во палети за да нема штета на патот до продавниците. На другите овошја не им треба толку внимание. Роланд Фумази, аналитичар за агробизнис во „Рабобанк“, вели дека целиот процес може да биде тежок. Луѓето нема да купуваат скапо овошје ако се разочарани од производот и затоа контролата на квалитетот треба да се спроведе внимателно.
Извор: agrosavjet.com
