Вработените во водостопанската подружница „Брегалница“ од Кочани денеска ја пуштија водата од каналите во оризовите површини во месноста Сазл`к, со што и официјално почнува овогодишната сеидба на оризот.
За почеток на наводнувањето се користат проточните води од реките на регионот, а до крајот на месецот ќе бидат ставени во функција левиот и десниот магистрален канал од хидросистемот во Брегалница.
„Во моментов во браната Калиманци се акумулирани околу 110 милиони кубни метри вода, а до почетокот на користењето на нејзиниот капацитет очекуваме таа дополнителнио да се наполни, па дури и да биде на прелевање. Најголем дел од каналите се исчистени, но нашите вработени остануваат на терен за да ја довршат подготовката на местата каде што има извесни проблеми. Очекуваме успешна реализација на наводнителната сезона, а годинава имаме зголемување на површините што ќе се засејат со ориз, односно според планот тие достигнуваат 4.200 хектари, а во кои влегува и делот кај штипското село Крупшиште, истакна Дени Митров, директор на водостопанската подружница „Брегалница“.
Приоритет во оспособувањето и чистењето на каналската мрежа за наводнување имаат местата каде најпрво се пушта водата, а градежната механизација во моментот е ангажирана во атарот на селото Облешево. Веќе е направено и пробно пуштање на водата во десниот магистрален канал на делницата до село Оризари, останува мал дел за бетонирање на оштетувањата меѓу селото Спанчево и Жиганци, по што ќе биде подготвен за користење.
Од водостопанската подружница апелираа до земјоделците навреме да ги завршат подготовките на нивите за сеидба на ориз и да се придружат кон планот и распоредот за наводнување, што ќе биде јавно објавен во сите месни заедници.
Извор: МИА
