Карпи, камења и земја се најдоа во коритото на реката Пена на потегот од Тетово кон месноста Бањиче. Таму од почетокот на месецот започнаа градежни работи со цел превенција од можни ерозивни процеси од планинско-ридестиот предел покрај коловозната лента, пешачката патека и коритото на река Пена.
Од Општина Тетово информираат дека во тек е процесот на уредување на планинско-ридестиот дел во вид на каскади со цел да се избегнат одрони, а коритото ќе се расчисти од камењата и карпите.
-Камењата, карпите и земјата коишто се најдоа во коритото се резултат на градежните работи за уредување на најкритичните точки од ридот долж патот и превенција од свлечишта. На крајот од изведувањето на работите речното корито ќе биде расчистено од камењата, карпите и земјата. Сите работи се под надзор на Секторот за комунални дејности – информираат од Општина Тетово.
Со специјална градежна механизација се копа на делот од планината каде што се појавуваа одрони и се прават каскадни предели за да нема повторно свлечиште на земја. Според најавите на Општина Тетово по најкритичните точки се планира поголем проект за заштита на овој дел од Бањиче.
Во текот на зимските месеци во неколку наврати поголеми делови од карпи и големи камења почнаа да се одронуваат и да паѓаат долж патот кон месноста Бањиче близу Тетово, која важи за рекреактивна дестинација за пешачење, трчање и велосипедизам.
Извор: МИА
