Согласно Уредбата за директни плаќања за 2021 година на корисници, за одржување на постоечки овошни насади со праски, кајсии, цреши и вишни објавена во Сл. Весник на РСМ бр.12/2021, детално ви ги претставуваме поблиските критериуми за директни плаќања, кој може да биде корисник на средствaта, максималните износи и начинот на директните плаќања за оваа година.
Мерка 1.7: Директни плаќања по обработлива земјоделска површина за одржување на постоечки овошни насади (праски, кајсии, цреши, вишни)
-Корисници на оваа подмерка се земјоделските стопанства кои имаат минимум 0,2 ха површина со постоечки овошни насади за секој овошен вид посебно и се регистрирани во Единствениот регистар на земјоделски стопанства;
-Прифатлив минимален број на овошки по хектар за за постоечки производни овошни насади, за секој од наведените овошни видови одделно е даден во следната Табела која е составен дел на оваа уредба;
Табела за минимален број на овошки – садници по хектар за постоечки производни овошни насади по овошни видови
| Ред. број | Овошен вид | Прифатливиот број на садници по хектар е над |
| 1. | праски | 330 |
| 2. | кајсија | 400 |
| 3. | цреши | 240 |
| 4. | вишна | 500 |
-Висината на директните плаќања за праска изнесува 36.000 денари по хектар, односно 42.600 денари по хектар за земјоделски стопанства со пријавена површина за финансиска поддршка од минимум 1 хектар до максимум 5 хектари;
-Висината на директните плаќања за вишна, кајсија, цреша, изнесува 33.000 денари по хектар, односно 39.600 денари по хектар за земјоделски стопанства со пријавена површина за финансиска поддршка од минимум 1 хектар до максимум 5 хектари;
-Висината на директните плаќања определени со оваа уредба, со оваа подмерка се намалува со зголемување на пријавените површини и тоа за секој вид одделно: од 0,2 ха до 5 ха 100%, од 5,1 ха до 30 ха 60%, и над 30 ха 30%.
Мерка 1.8: Дополнителни директни плаќања од подмерка 1.7. за овошни култури предадени во преработувачки капацитет
-Корисници на оваа подмерка се земјоделските стопанства кои имаат засадени површини со следните овошни видови: вишна, малина, капина, аронија, гоџи бери, кајсија, јагода и киви и се корисници од подмерка 1.7. на оваа уредба, оствареното производство на овошје да е предадено во преработувачки капацитети за овошје директно или преку еден регистриран откупувач во период од 26 декември 2020 година до 25 декември 2021 година, вклучително и произведените овошни култури за потребите на сопствениот преработувачки капацитет, запишан во Регистарот на откупувачи на земјоделски производи;
-Висината на директните плаќања изнесува 3 денари по килограм
Крајниот рок за поднесување на барањата за мерката 1.7 од Програмата за финансиска поддршка во земјоделството за 2021 година е до 31 мај 2021 година.
Крајниот рок за поднесување на барањата за мерката 1.8 од Програмата за финансиска поддршка во земјоделството за 2021 година е до 25 декември 2021 година.
Пријавувањето за субвенции за 2021 година се очекува да започне во почеток на месец април.
