После најавениот драстичен пад на приносите на печница во Велика Британија, мелничарите последниве недели увезуваат германска пченица.
Но, не се причина само малите приноси. Производителите на брашно уште пред неколку месеци започнаа со резервација на оваа житарка, поради помалиот број на засеани површини. Според последните податоци на тамошното Министерство за земјоделство, оваа година има дури 24% помалку засеани површини со пченица, што претставува најголем пад уште од 1970 година, а како главна причина се наведува влажното време во текот на есенската сеидба и сушната пролет.
До сега се откупени помеѓу 200.000 и 300.000 тони, а освен германска, се увезува и канадска пченица која има високо ниво на протеини потребни за спојување со пониско протеинската британска пченица, наведува Ројтерс.
Проблем со трговијата?
Иако пласманот моментално оди без проблеми, голем број трговци се загрижени што ќе се случи ако Европската унија и Британија не направат добар договор за трговија. Договорот за транзиција истекува на 31 декември, а условите за трговија со Германија после тој датум, не се договорени.
Ова земја минатата година увезе 1,05 милиони тони пченица вклучувајќи 155.037 тони од Германија. Минатата година Канада беше главен добавувач и тоа со 441.527 тони, а оваа година се очекува многу поголема количина.
Извор: Агроклуб
