Холандија треба што поскоро да ја укине употребата на биомаса за производство на електрична енергија, изјавија претставниците на Социоекономскиот совет (СРД) на Владата на ова Кралство.
„Во хемиската индустрија, градежниот сектор и земјоделството, биолошките материјали се клучни за премин кон кружна економија, но трајно произведената биомаса е премногу оскудна за да продолжи да се користи за производство на електрична енергија, за што има и други алтернативи со ниско ниво на јаглерод и обновливи извори“, се вели во извештајот претставен на почетокот на овој месец.
Експертите исто така веруваат дека треба да се укинат субвенциите вредни милијарди евра наменети за постројките, а парите да им бидат распределени на компаниите и вработените.
Жешка дебата во владата
Извештајот на советничката група на владата, само дополнително ја разгори жестоката јавна расправа за одржливоста на биомасата, која во претходните месеци имаше екстремен пад во Холандија.
Уште во месец мај, холандскиот министер за економски работи и климатска политика, Ерик Вибес, изјави дека биомасата е клучна за постигнување на целите за земјата во поглед на обновливата енергија и намалувањето на јаглеродот.
„Ако сакаме да ја постигнеме климатската цел, засега таа ќе ни ќе биде многу потребна“, рече Вибес, истакнувајќи дека пелетите што се користат во електраните се преостанатото дрво од таа индустрија.
Коментарите на министерот иницираа студија изготвена од страна на Националниот институт за стратегиска анализа на политиките од областа на животната средина, природата и просторно планирање (ПБЛ) во која учествуваа 150 различни организации и експерти.
Нивните заклучоци само додадоа „бензин во огнот“ затоа што сметаат дека различните форми на производство и употреба на енергиите не се споредливи. Владата остро реагираше нагласувајќи ја важноста на биомасата за постигнување на целите за намалување на емисиите на јаглерод во земјата, но еколозите реагираат дека намалувањето на јаглеродот се случува само на хартија.
60% од потрошувачката во ЕУ
Холандската дебата би можела да го унапреди развојот на ниво на ЕУ, каде се разгледува одржливоста на биомасата за енергетски цели.
Европската унија додаде критериуми за одржливоста на нејзината употреба во последната ревизија на ЕУ директивата, која беше договорена пред две години. Сепак, еколошките здруженија предупредуваат за неусогласеноста помеѓу биоенергетската политика и нејзините долгорочни климатски цели.
„Постојано ја следиме побарувачката за биомаса во земјите на ЕУ, како и нивната одржливост со цел подобро да ги разбереме и да ги следиме потенцијалните опасности за климата и биодиверзитетот“, објасни Европската комисија, додавајќи дека целиот извештај ќе биде објавен до крајот на оваа година.
Биоенергијата во моментов се смета за единствен јаглеродно-неутрален обновлив извор на енергија и претставува скоро 60% од потрошувачката на ЕУ, од кои дури 96% се произведуваат во Европа. Во Холандија, овој удел е 61% од 2018 година, а најголем дел се увезува во форма на пелети од дрво од Естонија, пренесува „Еурактив“.
Неговото укинување ќе значи дополнителни инвестиции во други обновливи извори, како што се соларни панели и ветерни турбини, кои се многу поскапа алтернатива.
Во пресрет на новата владина политика, шведската енергетска компанија „Ватнелвал“ веќе донесе одлука да ја одложи изградбата на планираната централа во Диемен.
Извор: Агроклуб
