Стимулирањето на женското претприемништво во најголема мера зависи од пристапот до капитал, воведувањето иновации и ефикасното користење нови технологии, е клучната порака од годинешниот Саем за женско претприемништво EXPO 2026, кој го организира канцеларијата на UN Women во земјата. Прашањето веќе не е како жените да се охрабрат да започнат бизнис, туку како тој бизнис да се развие, да вработи нови луѓе и да се пробие на меѓународниот пазар. На настанот кој веќе традиционално се одржува во овој период од годината, учествуваа претприемачки од земјата и од странство, креатори на политики, меѓународни организации.
Заменик министерот за економија и труд, Марјан Ристески порача дека се работи на систем за обезбедување квалитетни информации за учеството на жените во бизнисот што ќе овозможи да се креираат поефикасни и посоодветни политики за поддршка на женското претприемништво.
„Подготвивме измени на Законот за едношалтерски систем и за водење на трговскиот регистар и регистарот на други правни лица, чија цел е да се обезбеди водење родово разделена статистика за деловните субјекти. Овие измени, кои се во завршна фаза, се добра основа за следење на состојбите и движењата, за креирање солидна база на податоци заради креирање соодветни политики, односно мерки и активности во насока на поттикнување и поддршка на развојот на женското претприемништво во земјава“, рече Ристески.
Државниот секретар во Министерството за дигитална трансформација, Гордана Клинчарова, говореше за потребата женските микро и мали претпријатија да добијат практична поддршка за примена на вештачката интелигенција преку дигитална дијагностика, менторска и експертска помош, пристап до финансирање и инфраструктура, со цел новите технологии да придонесат кон конкретен раст и поголема конкурентност на бизнисите.
„Нашата цел не е секоја микро или мала компанија да стане технолошка компанија. Целта е секоја компанија, без разлика на големината, секторот или местото од кое работи, да може да утврди дали вештачката интелигенција може да ѝ помогне, да добие стручна поддршка, да пристапи до соодветно финансирање и безбедно да воведе решение што создава конкретна деловна вредност“, истакна Клинчарова.
Портпаролката на Владата, Марија Митева потенцираше дека со поттикнување на женското претприемништво се зајакнува македонската економија и се создава подобра иднина во земјата.
„Кога создаваме услови за развој на женското претприемништво, не инвестираме само во поединечни бизниси. Инвестираме во економската иднина на Македонија“, децидна е Митева.
Настанот се одржа во рамки на регионалната иницијатива за женско претприемништво на UN Women, со поддршка на Европската Унија. Од канцеларијата на UN Women порачаа дека економското јакнење на жените е неразделен дел од родовата еднаквост, но истовремено и важно прашање за економскиот развој.
„Поддршката за женското претприемништво не е трошок и не е помош само за жените. Таа е инвестиција во економски раст, иновации, нови работни места и во потенцијал кој сè уште не е целосно искористен. Кога една жена добива реална можност да го развие својот бизнис, ефектот не завршува со неа. Тој се пренесува врз нејзиното семејство, вработените, локалната заедница и целата економија“, изјави Весна Ивановиќ-Кастаред, раководителка на канцеларијата на UN Women во земјата.
Според податоците на Европската комисија, жените се сопственички на само 33 отсто од бизнисите во Европската Унија. Овие податоци укажуваат дека не е доволно само да се зборува за женското претприемништво, туку да се креираат конкретни мерки кои ќе ги охрабрат жените да започнат своја бизнис приказна.
„Женското претприемништво не е само приказна за успешни жени. Тоа е приказна за посилни компании, повеќе иновации, нови работни места и посилна економија. Токму затоа, не е доволно само да ги охрабриме жените да започнат бизнис. Треба да им помогнеме тој бизнис да го развијат, да воведуваат иновации, да пристапат до нови пазари и да станат конкурентни“, порача Даниела Димовска, директорка на ИНОВА.
За учество на годинешниот UN Women EXPO 2026 аплицираа речиси 100 претприемачки, од кои беа избрани 58, а 12 од нив имаа можност да ги презентираат своите бизниси пред посетителите на настанот. На Саемот за женско претприемништво беа избрани трите најперспективни женски бизниси. Наградите ги освоија Loolka, Loyalty Roadmap и Astarta.
UN Women
