Авионски третман против комарци ќе се реализира утре во Кавадарци, соопштија денеска од кабинетот на кавадаречкиот градоначалник Митко Јанчев.
Се известува населението дека во периодот од 5:30 до 7 часот, ќе се спроведе третото авионско третирање против комарци за 2026 година на територијата на општината. Третманот го опфаќа подрачјето долж течението на реката Луда Мара од село Марена, целото градско подрачје на Кавадарци, село Ваташа, па сè до браната Моклиште.
– Се апелира до сите пчелари во периодот на третирање, како и три до четири часа потоа, да ги затворат кошниците со цел заштита на пчелните семејства од можното влијание на средството – додадоа од кабинетот на Јанчев.
Во случај на неповолни временски услови, како врнежи од дожд или силен ветер, дезинсекцијата ќе се одложи за друг соодветен ден, за што јавноста дополнително ќе биде информирана.
-Третирањето ќе го изврши операторот ДВУ „РИМИН ЕР“ – ДООЕЛ – Штип, стои во соопштението од кабинетот на Јанчев.
МИА
