Жетвата на пченицата и јачменот во битолскиот дел на Пелагонија е во полн ек, а наскоро ќе се жнејат и површините под р”ж. Во изјава за МИА, раководителот на подрачната единица на Министерството за земјоделство, шумарство и водостопанство Стојан Христовски, истакна дека преносите од сите култури се солидни и со висок квалитет.
-Жетвата на пченицата е во тек, а до денеска од 12.000 хектари со пченица, досега ожнеани се 2.000 хектари. Во битолскиот дел на Пелагонија од површините со јачмен кои вкупно се 3.300 хектари, ожнеани се околу 2.000 хектари, а деновиве ќе почне жетвата на р”ж. Земјоделците жнеат и тритикале кое го има на површина од 700 хектари. Патем, родот е солиден, а јачменот е најдобар со приноси од 5000 килограми по хектар додека според првиот дел од жетвата на пченицата, просечно се собираат по 4000 до 5000 килограми лебно зрно на хектар, посочи Христовски.
Од ПЕ на Министерството за земјоделство, шумарство и водостопанство со седиште во Битола потсетуваат дека во тек се огласите за субвенционирање на повеќе земјоделски дејности кои завршуваат на 15 август, како и три повици за инвестиции во земјоделството кои се однесуваат на инвестиции за модернизација на земјоделски стопанства или за набавка на приклучна земјоделса механизација кои завршуваат за неколку денови, односно на 11 јули.
МИА
