Кај нас секој знае дека дренот е многу лековито растение поради изреката „Здрав како дрен!“, но ова растение е многу повеќе од тоа.
Освен што плодовите се јадат, дренот е медоносно и украсно растение, многу цврсто дрво отпорно на болести и штетници. Затоа постои изреката „Тврдо како дрен!“, а дрвото се користело за правење ками, копја, стапови, разни алатки и слично.
Подготовките од дренки се најпознати како природно средство кое помага при болести на грлото, бубрезите, анемија, дијареа, треска, рани, хемороиди, менструални болки, висок шеќер во крвта, вишок вода во организмот и ослабен имунитет.
Дренката најчесто се користи како лек за долготрајна дијареа бидејќи благодарение на танинот благотворно делува на подобра работа и подвижност на цревата, како и за опоравување и заздравување во случај на инфекција.
Редовното консумирање ја подобрува функцијата на црниот дроб и бубрезите. Сокот од дренка е одличен за закрепнување на дехидриран организам и за третман на анемија и слабокрвност. Корисен е за детоксикација, исфрлање на вишокот вода, при цревни заболувања, намалување на температурата, дијареа и повраќање и зајакнување на имунолошкиот систем.
Чајот од дренка помага при треска, болки во грлото, анемија, слаб имунитет и чистење на организмот. Тинктурата помага при болки во грлото, анемија, бубрежни заболувања, дијареа, хемороиди и дијабетес. Облогите се корисни за побрзо зараснување на раните, егзема, осип и инфекции на кожата. Кората се користи против температура и крварење. Благиот чај од суви цветови се користи за лекување на дијареа кај децата и други дигестивни нарушувања со дијареа. Листовите може да се користат за истата намена како и кората и плодовите.
Кога дренките целосно ќе созреат и омекнат, ќе станат темноцрвени и ќе паднат сами од себе, може да се јадат како свежо овошје. Од дренките може да се направи џем, мармалад, компот, сок, десерти, вино, ракија и други препарати.
