Во неколку откупни центри во Струмица, денеска се врши откуп на зимска зелка по 13 денари за килограм. -Годинава зелката е со добар квалитет и има поголеми површини засадени со оваа култура од страна на земјоделците. Имаме обезбедено пазар во Романија и Србија, така што очекуваме дека сезоната ќе биде задоволителна – велат откупувачите.
Освен зелка, за извоз во Романија спремни се и палетите со ресенски јаболка ајдаред по цена од минимални 7 денари за килограм, што е ниска цена за земјоделците но според трговците пазарот со јаболка е заситен со ефтини и квалитетни полски јаболка и од други земји каде што годината беше добра за ова производство. Едноставно нашите јаболка не се конкурентни на пазарите. Не станува збор само за соратата ајдаред туку и за другите повисоки сорти кои, за жал годинава и тие имаат ниска цена од 12 до 13 денари за килограм.
Откупот на зимската зелка е при крај. Се откупува по цена од 13 до 15 денари. Откупувачите велат дека таа варираи зависи од побарувачката на странските пазари каде што се намалува во моментов побарувачката. Откупот на пролетната зелка пак, се одвива по цена од 22 до 25 денари за килограм – изјави за Агротим, директорот на ДИЗ, Зоран Шапуриќ.
Уште еден проблем за кои јавуваат трговците е новината од страна на Србија која за увоз на македонската зелка им бараат дополнителни сертификати за пестициди и метали. На трговците очигледно ќе им треба дополнителна поддршка од ресорното министерство околу овие нови моменти од страна на Србија, според кажувањата на трговците.
Кога станува збор за пласманот на земјоделските производи, состојбата не е сменета со години. Сеуште е тој стихиен, неорганизиран, земјоделците не се здружени а трговците немаат обезбедено сигурни договори со странски купувачи за да може однапред да се планира производството со земјоделците.
Кооперантските односи, договорното производство остануваат единствено решение на состојбата со пласманот на земјоделските производи. Се додека не се регулира тој начин на соработка меѓу земјоделските производители и откупувачите, односно трговците, се до тогаш ќе постои несигурност за двете страни.
