Додека конфликтите на Блискиот Исток и згоелмените цени на енергијата ги тресат бројните сектори, унгарскиот пазар на јагнешко месо засега останува стабилен. И покрај глобалните неизвесности, побарувачката за овој производ е сè уште силна, особено пред велигденските празници, клучен период за секторот за овци, пишува Агроинформ.
Велигден претставува најважниот врв на продажба за унгарските одгледувачи на овци, кога дури 85 до 90 проценти од јагнешкото месо завршува на извозните пазари. Поголемиот дел оди во Италија, каде што побарувачката традиционално се зголемува за време на празничниот период.
Според Давид Мезесентџерџи, извршен директор на професионалната организација за секторот за овци и кози, и покрај геополитичките тензии, нема драматични промени. „Ситуацијата тука не е толку сериозна. Војната влијае на пазарите, но клучните велигденски извозни квоти веќе се договорени и нема значајни промени“, истакна тој.
Стабилна побарувачка, мал пад на цените
Експертите нагласуваат дека моменталните движења на цените се првенствено сезонски. Како што се приближува Велигден, понудата се зголемува, што може да доведе до мал пад на цените.
Пред неколку недели, цената на јагнешкото месо беше околу 6,4 евра за килограм, додека сега е околу 6,1 евро. Тоа е умерен пад што не се смета за загрижувачки, ниту пак е нужно директна последица од глобалните кризи. За производителите, ситуацијата засега останува стабилна, главно благодарение на континуираната силна побарувачка.
Најголем предизвик во моментов е логистиката, особено зголемувањето на цените на ѓубривата. Јагнињата се транспортираат на долги растојанија, често дури до северна Италија, што значително ги зголемува трошоците. Порано или подоцна, ова ќе влијае и на откупните цени, иако не е сигурно до кој степен ќе бидат на товар на производителите, а колку ќе се пренесе на потрошувачите.
Блискиот Исток: Силна побарувачка со логистички ризици
Освен Европа, значителен дел од извозот оди на Блискиот Исток, особено во Израел и Саудиска Арабија. Побарувачката таму останува висока, дополнително зголемена до крајот на Рамазан, кој оваа година е многу блиску до Велигден.
Сепак, постојат предизвици, пред сè во транспортот, кој најчесто се одвива по море. Иако рутите не минуваат директно низ воени зони, нестабилната геополитичка ситуација може да влијае на синџирите на снабдување. И покрај предизвиците, изгледите за унгарското јагнешко остануваат позитивни. Европската Унија не е самодоволна во производството на овој вид месо, таа покрива околу 87 проценти од сопствените потреби, што остава простор за понатамошен извоз.
„Унгарското јагнешко месо е висококвалитетен производ и ќе го има своето место на пазарот на долг рок“, нагласува Мезесентџердиј. Најголемиот ризик останува евентуалната ескалација на конфликтот, што би можело да предизвика посериозни прекини во транспортот, а не само зголемување на трошоците.
Паралелно со извозната сезона, започна кампања за поттикнување на домашната потрошувачка на јагнешко месо. Целта е овој традиционален, но често занемарен производ да се доближи до потрошувачите.
