Во Делчево започнаа активностите за санирање на улиците оштетени од невремето на 8 јуни 2023. Владата на последната Седница донесе одлука државните јавни претппријатија да се вклучат во санирањето на последиците од невремето во Делчево, по што денеска започнаа теренски активности за мерење на ширината и должината на делот од улиците кој е оштетен, по што ќе следуваат активности и за нивна санација.
-Според владината одлука, во интерес на граѓаните за нивно санирање, заштита и реконструкција, ангажирани се Јавното претпријатие за одржување магистрални и регионални патишта и Јавното претпријатие за јавни државни патишта. Двете јавни претпријатија имаат рок од шест месеци да достават извештај за извршената работа. Одлуката е донесена по известувањата доставени од општините со листа на приоритети за санација на штетите на инфраструктурата коишто се во надлежност на општината и листа на приоритети на инфраструктурни објекти коишто се во надлежност на Републиката, информираа од Општина Делчево.
Најкритичните места на кои во Делчево ќе се интервенира во Делчево се крак од улицата заедно со булевар „Македонија“, мостот на реката Брегалница, како и дел од улиците „Царевоселска“, „Голачка“, „Иво Лола Рибар“ и „Јане Сандански“.
Градоначалникот Трајковски посочи дека ова е уште еден доказ дека оваа Влада покажува вистинска грижа за граѓаните и помага на сите, кога е тоа најнеопходно.
-Штетите предизвикани од силното невреме во Делчево се големи и оваа поддршка од Владата е клучна за санација на поголемиот дел од оштетената инфарструктура. Останатата оштетена инфраструктура ќе се санира со средства од Буџетот на Општина Делчево. Очекувам деновиве да започнат градежните работи на критичните точки, рече Трајковски.
Силно невреме со пороен дожд и грмежи на 8 јуни во попладневните часови го зафати Делчево што предизвика оштетувања на дел од коловозите во градот и околината, а беа поплавени подрумски простории на куќи и други објекти во градот. До Општина Делчево беа поднесени 160 пријави за штети од физички и правни лица, а Комисијата за проценка на штетите по завршениот увид по поднесените пријави, ќе работи по новата методологија и има обврска да изготви елаборат кој ќе биде доставен до Републичката комисија за проценка на штетите.
