Брисел – Билатерална скрининг средба за Поглавје 11 – Земјоделство и Рурален развој.
Во салата на Европската Комисија и денеска тема е македонскиот аграр, гледан од европска перспектива.
После успешното претставување на нашата делегација во првиот ден од скринингот, денеска продолжи сесијата со неколку важни сектори од земјоделството кои беа разгледувани заедно со претставниците од Европската Комисија.
Презентации за земјоделските пазари, политиките на квалитет, органското земјоделство и промоцијата на земјоделските производи.
Нивните забелешки, прашања или коментари беа во насока на усогласување на нашата аграрна политика со Заедничката земјоделска политика на ЕУ. Коментарите најчесто почнуваа со пофални зборови за напредокот кој го има постигнато нашата администрација и се поголемото приближување до европската политика, а сугестиите во насока на подобрување на процесот но и најава за можноста која ја нудат мерките и буџетот на Унијата за поддршка на агросекторот.
Заменик главниот преговарач со ЕУ и државна секретарка во Секретаријатот за европски прашања (СЕП), Дрита Абдиу Халили со одговорноста која ја носи нејзината позиција, го изменаџира состанокот на високо ниво и пред експертите на Европската комисија од Генералниот директорат за Земјоделство и рурален развој како и Дирекцијата за добрососедство и проширување, потсети на важноста од процесот на прилагодување на македонскиот аграр со Заедничката земјоделска политика на ЕУ, потенцирајќи ја при тоа 2030 како година за членство во Унијата.
Освен Министерството за земјоделство, шумарство и водостопанство, кое е институција носител за ова поглавје, македонската делегација ја сочинуваат и претставници од: Агенцијата за финансиска поддршка во земјоделството и руралниот развој, Државниот земјоделски инспекторат, Агенцијата за храна и ветеринарство, Државна комисија за спречување на корупцијата како и на Секретаријатот за европски прашања.
Сите претставници од институциите одговараа соодветно на прашањата, добро подготвени, со бројки и факти кои го потврдуваа напредокот во областите за кои се дебатираше. Исто така се коментираа и состојби кои можат и треба да се подобрат особено во почитувањето на законите и мерки против можна корупција, што секако беше заеднички став како на ДКСК така и на министерот за земјоделство Љупчо Николовски и претставниците од ЕК.
Во дебата на тема трговската размена на овошјето говореше и Државниот секретар на МЗШВ, Реџаил Исмали кои ги потенцираше успесите во извозот на овошје и зеленчук, сектори кои бележат раст и влијаат во зголемувањето на девизниот прилив во државата.
Раководителот на одделение за земјоделство и безбедност на храна во СЕП и координатор на Поглавје 11 и 12 – Безбедност на храна ветеринарна и фитосанитарна политика, Синиша Цветаноски од првиот ден на скринингот го координира претставувањето на нашата делегација и денеска прв беше дојден во салата. Со неговиот коментар ќе го завршам овој краток извештај од лице место – Одличен тим сме!
Ленче Николовска
