Суплементацијата со витамин Д може да ја намали смртноста од рак за околу 13 проценти, покажуваат три мета-анализи на клинички студии.
Според научниците од Германскиот центар за истражување на ракот (DKFZ), доколку сите Германци над 50 години земаат витамин Д, може да се избегнат до 30.000 смртни случаи од канцер годишно и да се добијат над 300.000 години живот, со потенцијални заштеди во здравствените трошоци.
Истражувањата во последните години се фокусираат на влијанието на витаминот Д врз болести како рак, дијабетес, воспалителни и респираторни заболувања. Мета-анализите, кои вклучуваат висококвалитетни рандомизирани студии од целиот свет, потврдуваат дека витаминот Д ја намалува смртноста од сите видови рак за 13 проценти. Сепак, биолошките механизми зад овој ефект сè уште не се целосно разјаснети.
„Иако стапката на смртност од рак опаѓа во многу земји, новите лекови за рак често имаат висока цена. Витаминот Д, пак, е релативно евтин“, изјави епидемиологот Херман Бренер од DKFZ.
Недостигот на витамин Д е чест кај постарите лица и кај пациентите со рак. Според пресметките, суплементација со 1.000 меѓународни единици витамин Д дневно за 36 милиони Германци над 50 години би чинела 900 милиони евра годишно, но би овозможила заштеди од 1,154 милијарди евра од трошоците за лекување рак.
Бренер нагласи дека рутинското тестирање за нивоата на витамин Д не е неопходно, бидејќи дозата од 1.000 единици е безбедна и не предизвикува предозирање. Тој посочи дека во земји како Финска, каде храната се збогатува со витамин Д, стапката на смртност од рак е за околу 20 проценти пониска отколку во Германија.
МИА
