Примероците од водата земени по масовниот помор на риби во реката Одра, која ја формира границата меѓу Германија и Полска, покажуваат дека реката е значително загадена со жива, пренесуваат странските медиуми.
„Првите резултати се достапни од вчера вечерта. Сè уште ги немаме официјално, но тие навистина укажуваат на огромно загадување со жива“, изјави локалниот претставник за заштита на животната средина Грегор Бејер за јавниот сервис „Rbb“.
„Локалната управа веднаш ја отфрли теоријата според која причина за катастрофата може да биде премала количина кислород“, рече тој.
„Многу непријатниот дел од ова е што (токсините), кои очигледно дошле од правец на Полска, не биле пријавени преку соодветните системи за предупредување. Затоа можевме да реагираме само кога директно ќе се забележи поморот на рибите“, рече Бејер, шеф на управата за животна средина во областа Маркиш-Одерланд во германската покраина Бранденбург.
Полската агенција за заштита на животната средина наведе дека ненадејната смрт на илјадници риби во реката најверојатно била предизвикана од индустриско загадување на водата.
