(ВИДЕО) Изгоре единственото противпожарно возило на Пехчево, за среќа нема човечки жртви

Во пожарот кој со денови беснее над Пехчево изгоре единственото возило на пожарната од Пехчево. За среќа нема повредени лица.

„Еве ја вистинската слика за тоа што оставаат пламените јазици онаму каде ќе поминат, 

Ова е видео од противпожарното возило со кое денеска храбрите пожарникари се обиделе да му се спротивстават на новиот пожар над Пехчево

Среќа во несреќа е тоа што нема човечки жртви и учесниците во гаснењето поминале со помали изгореници“, напиша заменик-директорот на ЈП „Национални шуми“, Кире Михаилов, кој го сподели видеото на социјалните мрежи.

Директорот на ЦУК, Стојанче Ангелов, синоќа сподели видео од седницата на кризниот штаб во Пехчево и информираше дека рано наутро со гаснење ќе започнат два полициски хеликоптери.

„Помалиот хеликоптер ќе полни вода од специјално за таа намена наместен базен на стадионот во Пехчево а големиот Ми 171 со ведро од 2,5 тона ќе полни од 25 тонски базен со вида на приватна фирма која стопанисува со плантажа со лешници. Од земја ќе гаснат пожарникари од Берово, Виница, Кочани, Кавадарци како и вработени од Национални Шуми и тим од ДЗС“, напиша Ангелов.

Вчера попладне повторно избувна пожар кај месноста Јудови Ливади во Пехчево, а истиот беше забележлив и од бугарска страна. Градоначалникот на градот, Александар Китански, преку соопштение побара сите доброволци да се вклучат во гаснењето на пожарот.

-Почитувани граѓани пожарите во Пехчево се се уште активни! Сите доброволци за гасење на пожарот во Пехчево да бидат на зборно место плоштад свети Петар и Павле со себе да понесат лопати, истакна Китански во пренесениот апел од Кризниот Штаб и напомена дека најстрого се забранува самоиницијативно одење да се гаси пожарот.