Официјалната делегација на Владата на Република Северна Македонија, предводена од заменикот на претседателот на Владата, задолжен за економски прашања, координација на економските ресори и инвестиции, Фатмир Битиќи, која е во дводневна посета на Обединетите Арапски Емирати, по вчерашното одбележување на Националниот ден во рамките на Експо Дубаи 2020, денес, во утринските часови, учествуваше на бизнис-конференција која се одржа на самото Експо, а на која беа презентирани можностите за инвестирање во нашата земја.
Вицепремиерот Битиќи ја отвори бизнис-конференцијата во рамките на Експо Дубаи 2020 со порака дека Владата во бизнис секторот и во инвеститорите гледа партнери за поддршка на развојот на економијата.
„Ги избришавме разликите за државна поддршка кои постоеја помеѓу домашните и странските компании; сите компании кои работат во Северна Македонија ги имаат истите услови и можности за добивање поддршка од државата. Ова создава стабилност за работење и добра бизнис клима за инвеститорите. Владата прави напор, мерките и процесот на добивање на државна помош да бидат уште потранспарентни, поедноставени и поефикасни и токму затоа во тек е креирање на првиот дигитален асистент базиран на вештачка интелигенција за државна помош“, потенцираше вицепремиерот Битиќи.
