Астрономските цени на ѓубривата, кои за една недела поскапеа за 200 до 300 евра, ги прават речиси неисплатливи. Калциум амониум нитрат (КАS), најважното азотно ѓубриво за германските земјоделци, оваа недела поскапело за 210 евра на неверојатни 810 евра по тон, пишува Агрархеуте.
Цените на уреата во тамошните увозни пристаништа се зголемиле за речиси 300 евра на 1.050 евра за тон. Франција пријави зголемување од 300 на 925 евра по тон за 27%-ен амониум нитрат.
Растат и вредностите на другите ѓубрива, како што се фосфорните и калиумовите. Најважното фосфорно (DAP) оваа недела е 950 евра за тон, околу 150 евра повеќе од пред седум дена. Цените за калиумовите ѓубрива повторно поскапеле за 30 евра на 445 евра за тон.
Земјоделците се соочуваат со експлозија на трошоците што ќе има огромно влијание и врз приносите и врз квалитетот на новиот род. Во наредниот период се очекува верижен раст на цените на житариците и другите земјоделски производи, поради што ќе се влоши светската криза со храна.
Причината за драматичното зголемување на цените во Европа е војната во Украина и недостатокот на руски извоз на амониум нитрат и други важни азотни ѓубрива на светскиот пазар. Економските санкции воведени кон Русија и забраната за извоз од оваа земја предизвикаа недостиг. Покрај тоа, Украина воведе забрана за извоз, особено за уреа. Стравот од недостиг на азотни и други минерални ѓубрива, како и важни извори на енергија за нивно производство, особено руски гас, го предизвикаа овој голем скок и на европскиот и на светскиот пазар.
Во исто време, Yara и Borealis го намалуваат производството. Европските увозници од Северна Африка и Египет објавија нагло зголемување на продажните цени од 400 долари на повеќе од 1.000 долари за тон за само една недела.
И покрај екстремно високите вредности, може да се забележи нагло зголемување на набавките во САД за да се обезбедат доволно залихи за пролетните работи.
