Унгарското здружение на производители на житарки се спротивставува на забраната за увоз на земјоделски производи од Украина воведена од владата на земјата. Тие тврдат дека тоа ќе доведе до недостиг на храна во Унгарија и ќе ги загрози напорите за спречување на највисоката стапка на инфлација во Европската Унија, изјави за Bloomberg генералната секретарка на здружението, Зофија Поца.
„Земјата треба да увезе околу 700.000 тони сточна пченка по лошата жетва минатата година, а источниот сосед Украина би бил најевтин снабдувач. Членовите на здружението се очајни и не поддржуваат никакви забрани за увоз, бидејќи всушност ни треба увоз“, рече првиот човек на здружението, кое ги обединува мнозинството унгарски преработувачи и трговци на житарки.
Коментирајќи ја забраната што нивната влада ја воведе за увоз на украински житарки и други земјоделски производи до крајот на јуни, Поца нагласи дека тоа ќе изврши притисок врз цените на храната во Унгарија, каде стапката на инфлација веќе надминува 25 проценти.
„Имавме само извозни контроли, а сега имаме забрана за увоз. Тешко е тоа да се нарече поинаку освен дилетантизам“, заклучи таа.
Од вчера, 24 април, Романија започна со запечатување на возилата што превезуваат украински земјоделски производи, соопшти Украинската државна служба за безбедност во сообраќајот, пренесе APK-Inform.
Почнувајќи од 21 април, и Полска воведе постапка за запечатување на транзитни товари на украински земјоделски производи.
Чешка не планира да воведе забрана за увоз на жито и прехранбени производи од Украина, изјави чешкиот министер за земјоделство Зденек Некула. Тој вели дека анализите на украинските житарки, месо и јајца кои влегуваат во Чешка ја потврдиле нивната усогласеност со моменталните критериуми за квалитет.
