Унгарската влада воведува строги проверки на квалитетот и безбедноста на прехранбениот синџир за житарки кои доаѓаат од Украина, се вели во соопштението за печатот на Министерството за земјоделство на оваа земја.
Тврдат дека на тој начин ги штитат домашните производители од неделувањето на Брисел.
Министерот Иштван Наги истакна дека унгарските земјоделци можат да се потпрат само на владата на таа земја бидејќи, според него, ЕУ не го слуша гласот на европските земјоделци.
„Не можеме да дозволиме нашите земјоделци да страдаат затоа што коридорот за солидарност не функционира како што треба“, додаде министерот.
Тој изјави дека Унгарија ќе продолжи да дава секаква помош и поддршка за стоката да стигне до својата дестинација, односно до потрошувачите во Африка и Блискиот Исток, но дека ќе воведат „многу строга контрола на квалитетот“ за оние кои доаѓаат од Украина.
Тој се осврна на директната одговорност на домашните компании кои користат украински житарки и рече дека мора да користат само она што е во согласност со ЕУ и домашните регулативи. Посочува дека моменталната состојба е неодржлива бидејќи е стопирана продажбата на жито во оваа земја и низ цела Европа.
Потсети и дека Унгарија, Полска, Чешка, Словачка, Романија и Бугарија побарале од Европската комисија да преземе итни мерки за ограничување на увозот на овој вид производи од Украина.
„Увезените житарки, одгледувани во многу помалку тешки услови, вршат притисок врз цените, предизвикувајќи значителна конкуренција за земјоделците во соседните земји на Украина. Меѓутоа, Брисел не помага и продолжува да не прави ништо за да се елиминира неповолната конкурентска позиција на унгарските земјоделци“, тврди Наги.
