Извозот на клучните украински земјоделски производи е намален за речиси половина од почетокот на руската офанзива во февруари оваа година во споредба со истиот период во 2021 година, бидејќи поради борбите се блокирани пристаништата, а огромни посеви останаа неожнеани или уништени.
Украинскиот земјоделски извоз падна во периодот од 24 февруари до 15 август годинава на 10 милиони тони од околу 19,5 милиони тони во истиот период минатата година, покажуваат податоците на Министерството за земјоделство на Украина.
Се предвидува жетвата на житарки во 2022 година се да падне на околу 50 милиони тони од минатогодишните рекордни 86 милиони тони.
Според податоците на Министерството, Украина од 24 февруари до 15 август извезла 3,8 милиони тони пченка, 1,4 милиони тони семе од сончоглед, речиси еден милион тони сончогледово масло и околу 640.000 тони пченица.
Оваа земја, чие производство на храна, според владините податоци, може да нахрани до 400 милиони луѓе, извезувала и јачмен, соја и масло, сончогледова и соина сачма.
Кон крајот на јули, три украински црноморски пристаништа беа деблокирани во согласност со договорот меѓу Москва и Киев, со посредство на Обединетите нации и Турција.
Но, и покрај деблокирањето на пристаништето, украинскиот земјоделски извоз е значително помал отколку пред конфликтот, кога Украина извезуваше до шест милиони тони житарки месечно.
Министерството за земјоделство минатата недела објави дека во Украина во сезоната 2022/23 до 19 август, извозот на житарки паднал за 51,6 отсто во однос на претходната година на 2,99 милиони тони.
Извозот на житарки за сезоната 2021/22, која заврши на 30 јуни, забележил раст од 8,5 отсто на 48,5 милиони тони, благодарение на големиот обем на испораки пред руската инвазија, пренесува Ројтерс.
