Министерот за земјоделство, шумарство и водостопанство, Цветан Трипуновски синоќа го претстави македонското вино на настан кој што го организираше Државното претставништво на Северна Рајна Вестфалија во Берлин и Македонската амбасада, соопштија од МЗШВ.
-За нас, како мала земја, македонската винска индустрија е од особена важност бидејќи покажува позитивен потенцијал, позиционирајќи се себеси како втор најголем извозник во земјоделскиот сектор, истакнал министерот Трипуновски на настанот.
Според него, главната стратешка цел во политиките за лозарство и винарство е да се фокусира производството на локални сорти како Вранец, Станушина, Кратошија, Темјаника, Смедеревка и висококвалитетно грозје.
Министерот посочил дека климата во Македонија обезбедува идеални услови за да се истакнат најдобрите карактеристики на грозјето, а преку производствени практики воспоставени со Законот за вино, кој е усогласен со европското законодавство, се унапредува вековната традиција на лозарство и винарство.
-Вкупната површина на лозови насади е 23.000 хектари, од кои 79 % се во сопственост на индивидуални производители на грозје, а 21 % се на винарии. Значителен процент им припаѓа на малите семејни винарии со капацитет до 50.000 хектолитри, појаснил министерот Трипуновски.
Тој додал дека користејќи ги националните и европските фондови за финансиска поддршка, винариите сè повеќе инвестираат во надградба на опрема, реконструкција на плантажи, винарии, како и во инвестирање во човечки потенцијал, со јасна визија за производство на висококвалитетно флаширано вино.
Министерот во обраќањето истакнал дека токму преку ваквите настани се отвора можност за промоција на македонското вино и неговиот пласман на европските пазари.
