Сточари, фармери и претставници на ветеринарните служби и институции присуствуваа на трибина посветена на заштита од болеста чума кај овците и козите. Средбата која ја организира Агенцијата за храна и ветеринарство (АХВ) доаѓа откако пред извесно време оваа институција воведе мерки на засилен надзор на болеста чума кај малите преживари, особено во регионот на Западна Македонија.
Чумата кај козите и овците е болест која предизвикува сериозни економски штети, со оглед дека заболените животни се отстрануваат од стадата и усмртуваат, посочи Светлана Колариќ, државен советник во АХВ. Таа на трибината нагласи дека преземените мерки имаат за цел спречување на внесување и ширење на болеста од соседна Албанија во земјава.
– Болеста која се појави во Албанија предизвикува огромни економски загуби кај овците и козите, но друга страна, доколку се појави, ќе го загубиме статусот на земја слободна од болеста. Тоа ќе значи и забрана за извоз на јагнешко месо кое претставува наш стратешки производ, рече Колариќ.
Од АХВ посочуваат дека е засилена контролата на движењето и транспортот на животни од видовите овци по известувањето дека во Република Албанија во областа Дебар, во место Кастриот, на фарма со 200 кози има појава на болеста.
Одговорните во АХВ сметаат дека е важно да се почитува забраната за увоз и транзит на живи домашни животни, млеко и производи од млеко во Македонија од Албанија и спречување на евентуален шверц со живи животни. Решението со безбедносни-мерки на АХВ се однесува на целиот пограничен појас и е во координација со МЗШВ, Шумската полиција, ловните друштва, граничната полиција, ЦУК.
– Сите погранични општини го имаат ова решение за безбедносни мерки. Целта е да се направи една тампон-зона каде што, доколку се појави прв случај во пограничниот појас, да не смее болеста да ни се прошири во внатрешноста. Постојано сме во координација со Граничната полиција и 24 часа е отворена нашата линија за евентуално илегално преминување на животни, зашто официјалното преминување на животни е забрането, рече Колариќ.
Денешната трибина во Гостивар покрај информативниот карактер имаше за цел да делува и на намалувањето на ризикот од појава и проширување на болеста на македонска страна. Македонија е сточарска земја и во на има околу 400 илјади грла овци и кози.
МИА
