Веќе трет ден беснее големиот пожар во Националниот парк „Преспа” кај Пустец.
-Во гаснењето на пожарот се вклучени противпожарни служби од оваа и соседните општини, цивилната заштита, локалната и граничната полиција. Покрај непристапниот терен, дополнително проблем е и ветерот, кој е опасност и за луѓето што се вклучени во справувањето со огнената стихија, велат од Општина Пустец.
Додаваат дека поради големиот број пожари, сè уште не очекуваат интервенција од воздух, бидејќи истата е насочена кон гаснење на пожарите од кои опасност се по населени места, посебно на југот каде има евакуирани жители, изгорени домови и црква.
Министерството за одбрана на Албанија објави дека во текот на последните 24 часа во земјата се идентификувани 34 пожари, од кои 17 се сè уште активни, шест се под мониторинг, а 11 се изгаснати.
Според истиот извор денеска на терен се ангажирани 953 сили, 56 противпожарни возила, четири хеликоптери и еден италијански авион „Канадер“ во поддршка.
МИА
