Со литургија и закројување на лозите, винарницата „Стоби“ денеска го одбележа празникот Св. Трифун, заштитникот на виното и винарите.
На закројувањето, поради КОВИД мерките, изостана масовното присуство на граѓани.
– Овој ден за нас е посебен, 13 – та година по ред го славиме овој за нас значаен празник, воедно и роденден на Винаријата. Се надеваме на бериќетна година, и следната да го прославиме заедно со сите љубители на вино овој ден Св. Трифун, истакна сопственикот на винарија Стоби, Минчо Јорданов.
Генералниот директор на холдинг компанијата „Перминдекс“, за винарницата „Стоби, млекарницата „Галичник“, „Црвени Брегови“ и „Вардар Градско“, Никола Деребанов објаснува дека иако веќе втора година изминува откако нашата земја и светот се во пандемија, која создаде големи предизвици и проблеми во нормалното функционирање на бизнисите, сепак, тоа не влијаело на пласманот и извозот на вината произведени во винарница „Стоби“ која и понатаму работи успешно.
Деребанов посочи дека од оваа година почнува лансирањето на нова линија вина „Македон“.
– Новата линија на вина го носи името „Македон“ и дел од нив веќе можат да се дегустираат во некои од нашите поекслузивни ресторани, хотели или кафулиња. Засега „Македон“ вината ќе можат да се купуваат само во ХОРЕКА секторот, а истите во текот на оваа година ќе почнеме да ги пласираме и на сите извозни пазари каде веќе извезуваме од нашата широка палета на вина. Конкретно „Македон“ вината веќе неколку години се произведуваат, но првично беа наменети за извоз само во САД. Сега ќе го прошириме пласманот на вината и се надевам на успех и прифаќање од љубителите на вината како и досега, појаснува Деребанов.
„Стоби“ годишно произведува 4,5 милиони литри високо квалитетно вино од кои само 24 отсто се пласираат на домашен пазар, а 76 проценти се наменети за извоз на 18 пазари од регионот и светот. Најголеми извозни пазари се Кина, Сад и Русија, но значителна продажба остваруваат и во европски држави Холандија, Данска, Белгија и земјите од регионот.
Извор: МИА
