Температурата на Земјата достигна рекордни нивоа од пред 3.000.000 години, изјави генералниот секретар на ООН Антонио Гутереш.
„Минатата година беше уште еден невиден период на екстремни временски непогоди и климатски катастрофи“, рече Гутереш.
Според него, концентрацијата на јаглерод диоксид во атмосферата повторно е на својот максимум, надминувајќи го прединдустриското ниво за 148 отсто. Гутереш истакна дека ова е највисока бројка во последните три милиони години, кога температурата на Земјата беше за три степени повисока, а нивото на морето за 15 метри повисоко.
„Во согласност со сегашните обврски, сè уште се движиме кон катастрофален пораст на температурата од 2,4 степени до крајот на векот. Се наоѓаме на работ на бездната“, предупреди Гутереш.
„За да се спречи најлошото сценарио, човештвото мора да работи заедно за да појде на почист и позелен пат на развој, заклучи тој.
Извор: МИА
