Земјоделците од селата во Варна, Бугарија, пријавиле задавени животни со траги од заби. Инцидентите започналe во втората половина на декември и продолжуваат до денес.
Златина Георгиева на Божиќ на својата фарма пронашла 5 мртви телиња од кои секое тежело околу 350 килограми. Загрижената домаќинка го споделила проблемот со колегите од соседните населени места. Се покажало дека случаи на угинати животни има и во блиското село Изгрев. Таму земјоделците биле сведоци на нападот на волци кои задавиле 2 кози. Во своевидна истрага, оштетените земјоделци дошле до заклучок дека волкот или волците биле околу селото Изгрев до 20 декември, а потоа околу 25 декември се преселиле и почнале да го напаѓаат селото Изворско кое е на 12 км далеку.
„Првпат ми се случува вакво нешто. Волкот ги прескокнува електричните огради, ги брка телињата и го дави она што ќе успее да го фати“, вели Златина Георгиева.
Семејството одгледува вкупно 90 крави, јуници и телиња на фарма лоцирана на периферијата на селото. Во овој имот им е и семејната куќа, па животните не се сами навечер. Златина упати повик до градоначалникот на селото и до Подрачната полиција. Тој треба да го извести и шумското стопанство за ловџиите да организираат лов на волци.
Во овој период од годината ловците излегуваат да отстрелуваат штетен дивеч.
„Волците треба да се демнат ноќе кога се активни и напаѓаат животни. Се надевам дека нема да има напади врз луѓето“, вели загриженaта фармерка, пренесува agri.bg.
