На 27.02.2026 година, студентите од Факултетот за земјоделски науки и храна – Скопје при УКИМ во Скопје, во организација на IME – Increasing Market Employability и Palladium – Make it Possible, реализираа стручна посета на компаниите „Агро Гурмеш“ (с. Идризово, Скопје) и „Екстра Фунги“ (Кочани).
Студентите од студиската програма Дигитално земјоделство, Квалитет и безбедност на храна и Градинарство и цвеќарство беа предводени од проф. д-р Вјекослав Танасковиќ, проф. д-р Љубица Каракашова, проф. д-р Фросина Бабановска-Миленковска и м-р Стојаче Нечковски.
Во рамки на посетата на компанијата „Агро Гурмеш“, студентите се запознаа со современите практики во примарното производство и минималната обработка на зеленчук. Беше презентиран целиот производствен процес – од подготовка и обработка на почвата, сеење и заштита на посевите, до собирање, миење, калибрирање и пакување на производите со примена на современа механизација и технолошки линии.
Во компанијата „Екстра Фунги“ од Кочани студентите имаа можност да се запознаат со современ погон за преработка, опремен со модерни технолошки линии и висок степен на дигитализација на производниот процес. Производството опфаќа различни видови преработки од овошје, зеленчук и печурки, при што дигиталните системи овозможуваат ефикасна контрола на сите фази, од прием на суровини до дистрибуција на готовите производи.
Стручната посета претставуваше значајна можност за студентите да се запознаат со практичната примена на современи технологии и дигитални решенија во агро-прехранбениот сектор. Ваквите активности придонесуваат за збогатување на нивните практични знаења и компетенции, како и за зајакнување на соработката помеѓу Факултетот за земјоделски науки и храна – Скопје и приватниот сектор. Истовремено, тие претставуваат важен чекор во подготовката на идни стручни кадри, способни да одговорат на современите предизвици во областа на земјоделството и прехранбената индустрија.
Фејсбук статус на Факултетот за земјоделски науки и храна – Скопје при УКИМ во Скопје
