Бизнис Клубот Европа, како советодавно тело на Стопанска комора на Северна Македонија, го организира Форумот „Европската перспектива на македонскиот бизнис“, кој ќе се одржи на 18 февруари 2026 година во Виница, со почеток во 10:00 часот, Аудиториум на Прогресив академијата, I кат, во Виница.
Форумот ќе отвори клучна дебата за позиционирањето на македонските компании на Единствениот пазар на ЕУ, економските придобивки од европската интеграција и улогата на женското лидерство во градењето конкурентна и извозно ориентирана економија.
Бизнис Клубот Европа е формиран на иницијатива на претседателот на Комората, Бранко Азески, за да обезбеди структурирана платформа за дијалог и координација помеѓу бизнис-заедницата, академската јавност, релевантните чинители во евроинтегративните процеси и дипломатските претставници од европските земји. Главниот фокус на делувањето на Клубот е насочен кон прашања поврзани со Европската унија, интеграцијата на македонското стопанство во европските процеси, ЕУ-дипломатијата и градењето политики кон ЕУ од перспектива на бизнис-заедницата. Клубот ќе функционира и како ефикасен инструмент за обезбедување повратни информации од деловната заедница до Европската комисија, а ќе функционира и како проектна активност во рамки на Enterprise Europe Network.
