Средношколците од Земјоделското училиште од Кавадарци се вклучуваат во одбележувањето на „Свети Трифун”, информираа од воспитно-образовната установа што постои 66 години.
-Верскиот празник „Свети Трифун” се смета за заштитник на лозарите и винарите. По тој повод учениците од нашето земјоделско-шумарско училиште, подготвуваат настани во училишните простории, но и во Вински музеј Кавадарци. На денот кога традиционално во најголемиот лозаровинарски регион во државата, Тиквешкиот, со молитви и желби за добар род и полни бочви со вино, се закројуваат првите лозови прачки, појасни за МИА, Влатко Тасев, професор по македонски јазик во средношколскиот центар ,,Ѓорче Петров”. Тој откри дека со сценариото за одбележување на празникот се дава значење на обредното закројување што се врши на секој 14 февруари.
Се почнува од раните утрински часови, почнува новата лозарска година. Лозарите масовно ќе почнат со кроење на насадите, бидејќи тоа е многу важно за плодноста на лозјата. Работата на лозовите насади не е ниту лесна, ниту едноставна. Тоа е вештина, занает што се пренесува со генерации, се надоградува и љубоморно се чува. Тешката земјоделска работа е исполнета со пот и крв, со жртви и самопрегор. Секоја нова сезона е нов почеток, пренесе професорот, дел од сценариото за одбележување на „Свети Трифун”. За него, рече дека ја отсликува традицијата во Тиквешијата.
Тој беше дециден дека, иако времињата се менуваат, а и начините на производство на вино, останува аманетот да се произведува вино.
-Не ја личи македонската трпеза без чаша убаво црвено вино. Нема собир или прослава без нашето македонско вино. Многу обичаи како неизоставен дел го имаат виното, додаде Тасев.
