Претседателот на Србија, Александар Вучиќ вчера изјави дека државата од четврток, 10 март, ќе го прекине извозот на пченица, брашно, пченка и масло.
„Во претходните два дена извозот на пченица и брашно толку скокна што мораме да го забраниме“, рече Вучиќ.
Тој, исто така, изјави дека државата ќе субвенционира гориво за земјоделците.
„Субвенционираме за нив цената на евродизелот на сите бензински пумпи на Нафтената индустрија на Србија најмалку месец и половина да остане 179 динари. За сите останати ќе има минимални зголемувања за да се обезбеди снабдувањето“, изјави Вучиќ.
Тој додаде дека државата ќе се откаже од 20 отсто од акцизата за да се стабилизира цената на горивото, а во март ќе треба да обезбеди дополнителни 150 милиони евра за Електроиндустријата на Србија и Србијагас поради недостиг на јаглен и гас.
Вучиќ нагласи дека Србија ја чека одлуката на Европската унија (ЕУ) за увоз на енергенси од Русија, откако таа беше забранета од САД поради рускиот воен напад врз Украина, кој започна на 24 февруари.
„Ако одлуката е да се забрани увозот на сите извори на енергија од Русија, тогаш и ние сме во неволја. Немаме од каде да ги добиеме, нафтата и гасот не можат да паѓаат од небо“, изјави Вучиќ за ТВ Б92.
